काठमाडौं / ऋषि कट्टेल नेतृत्वको नेपाल कम्युनिष्ट पार्टीको दल आधिकारिकता सम्बन्धी सर्बोच्च अदालतमा परेको मुद्दाको अन्तिम फैसला हुने भएको छ ।
पार्टीका अध्यक्ष ऋषि कट्टेलले दायर गरेको रिटमाथिको सुनुवाई आज सकिएसंगै फागुन २० गते मुद्दाको अन्तिम फैसला हुने भएको हो ।
सर्बोच्चका न्यायाधीश बमकुमार श्रेष्ठ र कुमार रेग्मीको संयुक्त इजलासले निर्णय सुनुवाईको मिति तोकिएको हो ।
निर्वाचन आयोगले २०७५ मंसिरमा केपी शर्मा ओली र पुष्पकमल दाहाल प्रचण्ड अध्यक्ष रहेको नेपाल कम्युनिस्ट पार्टी (नेकपा) लाइ आधिकारिकता दिएकोमा कट्टेलले नेपाल कम्युनिस्ट पार्टी आफ्नो नाममा दर्ता रहेकोभन्दै सर्बोच्चमा रिट दायर गरेका थिए ।
तत्कालीन नेकपा एमाले र माओवादी केन्द्रबीच २०७५ जेठ ३ गते एकीकरण भएर नेपाल कम्युनिष्ट पार्टी बनेको थियो । सोही नामको पार्टी त्यसअघि नै निर्वाचन आयोगमा ऋषि कट्टेल अध्यक्ष रहेको दर्ता रहेको र दुइटा पार्टीको नाम एउटै राख्न नमिल्ने भएपछि पछि ब्राकेटमा नेकपा राखिएको थियो ।
कट्टेलले ओली र प्रचण्ड अध्यक्ष रहेको नेकपाको दर्ता खारेज गर्न माग गर्दै निर्वाचन आयोगमा उजुरी समेत दिएका थिए तर आयोगले उनको दाबी खारेज गरिदिए पछि कट्टेल अदालत गएका थिए ।
अदालतमा पटक-पटक सुनुवाई स्थगित हुँदै आएकोमा दुई वर्षपछि अब फैसला हुने भएको हो ।
