मारवाडी सेवा समितिले १९ वर्षअघि खुट्टा गुमाएका सिन्धुली घ्यांलेक गाउँपालिका–४ का संग्राम स्याङ्तानलाई मोडुलर कृत्रिम खुट्टा प्रदान गरेको छ । समितिले अपांगता भएका दुईजना गरिब तथा असहाय व्यक्तिलाई हरेक साता निःशुल्क कृत्रिम खुट्टा वितरण गर्दै आएकोमा यसपटक स्याङ्तानले प्राप्त गरेका छन् ।
पशुपति गौशाला धर्मशालास्थित कार्यालयमा समितिका पदाधिकारीले कृत्रिम खुट्टा हस्तान्तरण गरेका हुन् । ‘हामी हरेक साता गरिब असहायहरूलाई कृत्रिम खुट्टा निःशुल्क वितरण गर्दै आएका छौँ, स्थानीय वडा कार्यालयको सिफारिसका आधारमा हामी उपलब्ध गराउँछौँ’ समितिमा पदाधिकारी महावीर घिरइयाले भने, ‘हाम्रो कार्यालयमा आएर जोसुकैले पनि यो सुविधा लिन सक्छन् ।’
समितिले कृत्रिम खुट्टा उपलब्ध गराएपछि उनले बैसाखी छाडेका छन् । ‘२०६१ सालमा फलामेतारले खुट्टा काटेको थियो । टिटानसको सुइ लगाउनुपर्ने रहेछ, मैले बेवास्ता गरेँ’ ५९ वर्षीय स्याङ्तानले भने, ‘पछि खुट्टा काट्नुप¥यो ।’
चार छोरा र चार छोरीका बाबु उनले भने, ‘कृत्रिम खुट्टा लगाएपछि मैले गाउँमा गएर काम पनि गर्न सकेँ । हिलो र धुलोबाट बचाएपछि कृत्रिम खुट्टा टेकेर काम गर्न सकिनेरहेछ ।’
घिरइयाका अनुसार २०५९ देखि समितिले निःशुल्क कृत्रिम खुट्टा वितरण गर्दै आएको छ । ‘हामी यो काम निरन्तर जारी राख्छौँ, अपांगता भएका विपन्न व्यक्तिहरूले लाभ लिन सक्नुहुन्छ’ घिरइयाले थपे, ‘काठमाडौंबाहिरबाट आउनुपर्ने अवस्थाका असहाय व्यक्तिहरूलाई हामी गौशाला धर्मशालामा निःशुल्क बस्ने व्यवस्था पनि मिलाइदिन्छौँ ।’
यो समाचार नयाँपत्रीका दैनिकबाट साभार गरिएको हो ।
