चितवन / बागमती प्रदेशका मुख्यमन्त्री डोरमणी पौडेलले चितवनको माडीमा निर्माण हुने राम मन्दिर निर्माण स्थलको अवलोकन गर्नुभएको छ ।
माडीमा अयोध्याधाम बनाउनका लागि राम र सीताको मूर्ति तयार गरि आउदो रामनवमीमा सो मूर्तिलाई प्रतिस्थापन गर्ने तयारीका लागि मुख्यमन्त्री पौडेलले राम मन्दिर अवलोकन गर्नुभएको हो ।
अबलोकनपछि भएको अन्तरक्रिया कार्यक्रममा मुख्यमन्त्री पौडेलले अयोध्याधाम निर्माणले माडीको जनजीवनमा अत्यन्त ठूलो प्रभाव पार्ने बताउनुभयो । उहाँले राम मन्दिर अयोध्याधाम निर्माणमा प्रदेश सरकारले आबस्यक सहयोग गर्ने बताउनुहुदै खर्चको बारेमा चिन्ता नगर्न सबैलाई अनुरोध गर्नुभयो । “राजनीतिक पार्टीको रुपमा विभाजन नगरी सबैको साझा सहमति बनाएर अगाडि बढ्नुपर्छ । तीनै तहको सरकारले यसको जिम्मा लिन्छ ” मुख्यमन्त्री पौडेलले भन्नुभयो ।
आगामी वैशाख ८ गते रामनवमीको अबसर पारेर राम मन्दिर निर्माण स्थलमा विशेष कार्यक्रम गरि राम सिताको मुर्ती प्रतिस्थापन गरिने बताइएको छ । यस कार्यका लागि पूर्वसांसद तीर्थ भुसालको संयोजकत्वमा समिति समेत निर्माण गरिएको छ । अयोध्याधाम निर्माणका लागि प्रधानमन्त्री ओलीको व्यक्तिगत सहयोगमा राम र सीताको मूर्ति समेत तयार भएको छ । मूर्ति प्रधानमन्त्रीको सचिवालय बालुवाटार परिसरमा राखिएको छ । प्रधानमन्त्री ओलीको सौजन्यमा झण्डै पाँच फिट अग्लो राम र सीताको मूर्ति तयार भएको बताइएको छ ।
प्रधानमन्त्री ओलीले गत माघ १७ गते चितवनको भरतपुरमा आयोजित बृहत जनसभालाई सम्बोधन गर्दै अयोध्यापुरीमा अयोध्याधाम निर्माण गर्न बृहत गुरुयोजना बनिसकेको र राम सीताको मूर्ति तयार भइसकेको बताउनुभएको थियो ।
माडी नगरपालिकाले कृष्णनगर पार्कमा राख्ने गरी १०० बिघा जग्गासहित अयोध्याधाम बनाउन सिफारिस गरेको छ । गत असार २९ गते प्रधानमन्त्री केपी शर्मा ओलीले भगवान रामको जन्म नेपालमै भएको दाबी गर्नुभएपछि माडीको चर्चा बिश्वभर चुलिएको थियो ।
(फोटोको श्रोत : सुरज थपलियाको फेसबुक )
