काठमाडौँ / नेपाली कांग्रेसले शेरबहादुर देउवालाई प्रधानमन्त्री बनाउन राजिनामा दिने एमालेका सांसदहरूलाई उप चुनावमा जिताउने प्रतिवद्धता जनाएको छ । एमालेका निलम्बित नेता माधवकुमार नेपाल र भाीम रावलसँग मंगलबार राति भएको भेटवार्तामा कांग्रेस सभापति शेरबहादुर देउवासहितका नेताहरूले राजिनामा दिने सबैलाई उपचुनाव मार्फत विजयी गराउन लिखित गर्न तयार रहेको बताएका छन ।
मंगलबार रातिको भेटमा देउवाले एमाले सांसदको राजिनामाबिना कुनै निर्णय गर्न पनि अफ्ठेरो रहेको बताएपछि नेता नेपाल र रावलले ओली पुनः सत्तामा आउन नदिनका लागि कांग्रेसले भनेको संख्यामा एमाले सांसदको राजिनामा गराउने बताउनुभएको थियो ।त्यतिखेर माधव नेपालले १६ सांसदको राजिनामा दिलाउन तयार रहेको बताउनुभएको थियो ।
त्यसको बदलमा देउवाले माधव नेपालसहितका राजिनामा दिने सांसदहरूलाई उप चुनाव जिताइदिने प्रतिवद्धता व्यक्त गरेको बुझिएको छ । उहाँले एमालेबाट राजिनामा दिएपछि घर न घाटको हुने अवस्थामा नेपाली कांग्रेसको रूख चिन्हमै चुनाव लड्न दिने समेत बताउनुभएको बुझिएको छ । त्यसपछि नेपालले एमाले नै छाडेपछि चुनाव चिन्ह जुन भए पनि फरक नपर्ने तर केपी ओलीलाइ सत्तामा कुनै पनि अवस्थामा टिक्न दिन नहुने बताउनुभएको थियो ।
त्यसअघि बसेको माधव समूहको स्थायी कमिटी बैठकले भने देउवालाई प्रधानमन्त्री बनाउने नाममा संसदको जागिर छाड्न नहुने निष्कर्ष निकालेको थियो ।सोही निष्कर्ष बोकेर देउवा निवास पुगेका नेपाल र रावललाइ देउवाले उप चुनाव जिताउने प्रतिवद्धता व्यक्त गरेका थिए । देउवाले राष्ट्रियसभाको उपनिर्वाचनमै इमान्दारिता देखाइसकेको भन्दै धेरै परीक्षण नगर्न आग्रह समेत गर्नुभएको थियो । ( दैनिकीबाट )
