मकवानपुरगढी- देशैभर कोरोना महामारी अन्तर्गत कोभिड १९ को दोश्रो भेरिएन्ट बढे सँगै मकवानपुरगढीमा पनि यसको प्रभाव बढिरहेकाले गाउँपालिकाले योजनाका सम्झौता तथा कार्य सम्पन्नका फाइल उपभोक्ता समितिले अब वडाहरुमै बुझाउनु पर्ने भएको छ । उपभोक्ता समितिका कुनैपनी सदस्य योजनाका कामले गाउँपालिका कार्यालयमा उपस्थिति हुन पाउने छैनन् ।
त्यस्ता संकलन भएका फाइलहरु वडा सचीव तथा प्राविधिकहरुले गाउँपालिका कार्यालय सम्म पुर्याई योजना शाखामा जिम्मा लगाउनु पर्ने गरि ब्ववस्था गरिएको छ । कोभिडबाट सुरक्षित भइ काम गर्नुपर्ने भएकोले गाउँपालिका कार्यालयमा भिडभाड कम गर्ने उदेश्यले यस्तो ब्यवस्था गरिएको हो ।
गाउँपालिकास्तरीय कोभिड १९ रोकथाम तथा नियन्त्रण समन्वय समितिको शुक्रवार बसेको बैठकले यस प्रकारको निर्णय गरेसँगै गाउँपालिकाले सबै वडाहरुलाई कार्यान्वयन गर्न भनेको हो ।
गाउँपालिका लगायत वडा कार्यालयहरुमा उच्च सतर्कताका साथ सेवाग्राहीसँग डोरिले सिमाङ्कन गरि काम गर्ने , साबुनपानीले हात धुने ब्यवस्था मिलाउने , सेनिटाइजर , मास्क लगायतका सामाग्रीको प्रयोग गरि काम गर्ने , अत्यावश्यक उपभोग्य सामानका पसलहरु सावधानी तथा सुरक्षा अपनाउँदै बिहान ५ बजेदेखि ८ बजेसम्म मात्र खोल्न पाउने , होटल तथा जमघट हुने स्थानहरू पुर्णरुपमा बन्द गर्ने , औषधि पसलहरु पुर्णरुपमा संचालन गर्ने निर्णय भएको छ ।
साथै समाजमा हुने अन्य गतिविधि ब्यवस्थापन तथा नियन्त्रणका लागि वडाहरुमा गठन गरिएका टोलविकास संस्थाहरूलाई सक्रिय गराउने निर्णय भएको छ ।
(पुर्णपाठ)
