काठमाडौं / राष्ट्रिय प्रजातन्त्र पार्टीले राष्ट्रिय सभाको निर्वाचनमा नेकपा (एमाले )का उम्मेदवार लाई मतदान गर्ने निर्णय गरेको छ ।
पार्टीको सोमबार बसेको बैठकले राष्ट्रिय सभाको बागमती प्रदेशबाट निर्वाचित हुने रिक्त सदस्य पदको निर्वाचनमा एमालेका रामबहादुर थापा(बादल) लाई मतदान गर्ने निर्णय गरेको हो ।
एमालेले निर्वाचनमा आफ्ना उम्मेदवारलाई मतदान गर्न राप्रपालाई अनुरोध गर्दै एमाले अध्यक्ष तथा प्रधानमन्त्री केपी शर्मा ओलीले राप्रपाका अध्यक्ष कमल थापालाई फोन गर्नुभएको थियो ।
एमालेको संस्थागत निर्णय गरि आफ्ना उम्मेदवार बादललाई मतदान गरी सहयोग गर्नका लागि पत्र पठाएपछि राप्रपाले एमालेका उम्मेदवारलाई मतदान गर्ने निर्णय गरेको हो ।
पार्टीले आफना पार्टीबाट निर्वाचित प्रदेशसभाका सदस्य, गाउँपालिकाका अध्यक्ष तथा उपाध्यक्षलाई नेकपा (एमाले)का उम्मेदवार रामबहादुर थापाको पक्षमा मतदान गर्न जानकारी गराउने निर्णय गरेको छ । जसमा राप्रपाको मत मूल्य १३२ छ ।
बागमती प्रदेशमा जेठ ६ गते उपनिर्वाचन हुँदै छ।
