मकवानपुर- मकवानपुर जिल्लाबाट अष्ट्रेलियामा गई बसोबास गर्ने मकवानपुरेहरुले हेटौंडा अस्पताललाई १०० थान अक्सिजन सिलिन्डर सहयोग गरेका छन् ।
अष्ट्रेलियामा बसोबास गर्ने मकवानपुरेहरुको संस्था Makawanpur Community Australia (MCA) ले त्यहाँ बसोबास गर्ने नेपालीहरुबाट आर्थिक सहयोग संकलन गरी १०० थान अक्सिजन सहितको सिलिन्डर खरिद गरेर कोभिड – १९ का बिरामीहरुलाई सहयोग गरेका हुन् । हेटौंडा लेडी JCI मार्फत हेटौंडा स्वास्थ्य विज्ञान प्रतिष्ठान हेटौंडा अस्पतालका रजिस्ट्रार राजेश प्रसाईंलाई आइतबार एक कार्यक्रमका बीच उक्त सिलिन्डर हस्तान्तरण गरिएको छ।
सिलिन्डर हस्तान्तरण कार्यक्रममा लेडी जेसिजका अध्यक्ष प्रतिमा श्रेष्ठ, पूर्व संबिधान सभा सदस्य तथा परिषद अध्यक्ष अनन्त पौडेल , हेटौंडा ११ का वडाध्यक्ष गोकर्ण पराजुली,जेसिजका पूर्व अध्यक्ष रश्मि बस्नेत,प्रतिष्ठान सदस्य हीरा वाइवा , स्थानीय पत्रकार सहितको उपस्थिति रहेको थियो ।
विश्वब्यापी कोभिड- १९ महामारीका कारण मकवानपुरका कोरोना संक्रमित बिरामीहरुलाई निकै नै समस्या परिरहेको समाचार माध्यममा आइरहेका बेला सहयोग पुर्याउने उद्देश्यले यस संस्थाबाट सहयोग गरिएको र आगामी दिनमा पनि यस्तै मानवीय कार्यलाई निरन्तरता दिइने कुरा Makawanpur Community Australia (MCA) का सचिव शुभेच्छा लामिछाने (सापकोटा) ले बताउनुभयो ।
