मकवानपुरगढी- कोभिड संक्रमितको संख्या बढ्दै गए सँगै वडा नम्बर ३ लक्ष्यित गरि मकवानपुरगढी सामुदायिक कोभिड प्रतिकार्य समूह गठन भएको छ ।
वडा नम्बर ३ का वडा अध्यक्ष भागवत घिमिरेको अध्यक्षतामा आज भएको भेलाले वडाध्यक्षताको संयोजकत्वमा वडाका जनप्रतिनिधि सदस्यहरु , स्वास्थ्यकर्मी , सहकारीकर्मी , सुरक्षाकर्मी , पत्रकार लगायत संलग्न रहनेगरी एक समूह तयार गरिएको हो ।
भेलाले वडा नम्बर ३ का स्वास्थ्य प्रमुख उमेश अधिकारीको संयोजकत्वमा आकस्मिक उद्दार समुह गठन गरेको छ । समुहको सदस्यहरुमा ईलाका प्रहरी कार्यालय मकवानपुरगढी मक्रान्चुलीका प्रमुख जनकराज कार्की , संचारकर्मी गोविन्द शर्मा , जनप्रतिनिधि र संम्बन्धित टोलविकास संस्थाका संयोजक रहनेछन् ।
यसैगरी भेलाले युवा ब्यवसायी तेजराज अधिकारीको संयोजकत्वमा राजु सापकोटा , कमल फँयल , निर्मला लम्साल , चन्द्र योन्जन , सन्तोष सापकोटा र विदुर हुमाँगाई सदस्यहरु रहनेगरी ७ सदस्यीय आकस्मिक कोभिड सहायता कोष संकलन तथा राहत वितरण समिति गठन गरेको छ । समितिले संक्रमित परिवारको आर्थिक अवस्थाको मध्यनजर गर्दै सहयोगीहरुबाट आर्थिक संकलन गरि राहत ( औषधि , फलफुल तथा खाद्यान्न ) वितरण गर्नेछ ।
वडा अध्यक्ष विकास निर्माण लगायत विभिन्न गतिविधिमा संलग्न हुनुपर्ने भएकोले कोभिड सम्बन्धि आकस्मिक रिपोर्टिङका लागि उमेश अधिकारीको संयोजकत्वमा जानकी दाहाल सदस्य रहनेगरी दुई सदस्यीय समिती गठन भएको छ । समितिले वडाका विभिन्न टोलबाट प्राप्त सुचना संकलन गरि वडा अध्यक्ष सम्म पुर्याउनेछ ।
कोभिड संक्रमित बिरामीको उपचारका लागि प्लाज्मा आवश्यक पर्न सक्ने भएकाले हालै कोभिड संक्रमणबाट मुक्त भएकाहरुको विवरण संकलन गरि आवश्यक समन्वय गर्नका लागि स्वास्थ्यकर्मी उमेश अधिकारीको संयोजकत्वमा ३ सदस्यीय प्लाज्मा बैंक उपसमिति गठन भएको छ । समितिमा गंगा हुमागाई र राजु सापकोटा सदस्य रहेका छन् ।
वडामा कोभिड प्रभावितको संख्या बढ्दै गएकाले त्यसको नियन्त्रणका लागि विभिन्न जनचेतना सहितको सुचना अटोको माध्यमबाट टोल-टिलसम्म माईकिङ गर्ने , रेडियो मकवानपुरगढी, अनलाइन पत्रीका शुभ बिहानी डटकमबाट सन्देशमुलक सुचना प्रसारण गर्ने तथा संक्रमित परिवारको घरमै गएर आवश्यक मनोवैज्ञानिक सेवा प्रदान गर्ने निर्णय भएको छ ।
वडाका विभिन्न स्थानमा अनावश्यक रुपमा मानिसहरुको जमघट , आवत-जावतमा रोक लगाउने सार्वजनिक स्थानमा साबुनपानीले हात धुने ब्यवस्था मिलाउनुका साथै कोभिडमुक्त वडा बनाउन सबैले आ-आफ्नो स्थानबाट सहयोगी भुमिका निर्वाह गर्ने निर्णय भएका छन् ।
स्थानिय युवा कमल फँयल र तेजराज अधिकारीको विशेष पहलमा मंगलबार भर्चुअल बैठक संचालन गरि वडा अध्यक्ष लगायत सबैको राय-सल्लाहमा भेलाको आयोजना गरिएको हो । आज गठन गरिएको समुहले ३ नम्बर वडामा मात्र सिमित नरही आवश्यक अनुसार अन्य वडाहरुमा पनि कोभिड सम्बन्धमा कार्यक्रम संचालन गर्ने जनाइएको छ ।
