हेटौंडा । उपत्यकामा जारी निषेधाज्ञाबारे छलफल गर्न आईतबार काठमाडौं, भक्तपुर र ललितपुरका कोभिड–१९ जिल्ला संकट व्यवस्थापन समिति डिसीसीएमसीको बैठक बस्दैछ ।
आजको बैठकले खुकुलो जारी निषेधाज्ञा खुकुलो बनाउँदै एक साता निषेधाज्ञा थप्ने निर्णय गर्ने बताईएको छ । तर जोर बिजोरका आधारमा सवारी साधन चल्न दिने कि नदिने भन्ने बिषनयमा समेत आज छलफल हुनेछ । डिसीसीएमसीको बैठकपछि तीन प्रमुख जिल्ला अधिकारीबीच हुने छलफलले निषेधाज्ञाबारे निर्णय गर्नेछ । आईतवार र सोमवार सम्म तीनवटै प्रमुख जिल्ला अधिकारीको बैठक बसेर निषेधाज्ञाको मोडालिटीबारे टुंगो लगाउने काठमाडौंका प्रमुख जिल्ला अधिकारी कालीप्रसाद पराजुलीले बताउनुभयो ।
कोभिड–१९ निर्देशक समिति बैठकले अबका दिनमा ‘स्मार्ट लकडाउन’ गर्ने निर्णय गरेको थियो । यसको मोडालिटी बनाउने जिम्मा कोभिड–१९ संकट व्यवस्थापन समिति (सीसीएमसी)लाई दिइएको छ । तर सीसीएमसीले अन्तिम निर्णय गरिसकेको छैन । जनजीवनलाई सहज बनाउँदै वैज्ञानिक लकडाउनलाई स्मार्ट लकडाउन भनिएको हो ।
सिसिएमसिका अनुसार संक्रमण धेरै देखिएका क्षेत्रलाई मात्र सिल गरेर परीक्षण र कन्ट्रयाक ट्रेसिङलाई बढाउने प्रावधान ‘स्मार्ट लकडाउन’को प्रावधानमा राख्ने तयारी छ । यसको मोडालिटीमा स्वास्थ्य मापदण्ड पालना गराएर आर्थिक गतिविधिलाई अगाडि बढाईने बताइएको छ । गत वर्ष लकडाउन खुकुलो पार्दै जाँदा प्रशासनले जोर–बिजोर प्रणालीमा सवारी साधन चल्न दिएको थियो । त्यसो गर्दा भीड ह्वात्तै बढेको भन्दै आलोचना भएको थियो । उपत्यका प्रशासनले पनि सवारीसाधन सञ्चालन गर्न दिने/नदिनेबारे विज्ञसँग पनि छलफल गर्ने भएको छ ।०००
