हेटौंडा । विपक्षी गठबन्धन दलका शीर्ष नेताहरुले संबिधान र लोकतन्त्र संस्थागत नभएसम्म गठबन्धन कायमै रहने बताएका छन् ।
विहिवार विपक्षी गठबन्धनले गरेको पत्रकार सम्मेलनमा शीर्ष नेताहरुले संविधान, लोकतन्त्र र विधिको शासनका लागि बिगतमा जस्तै आमसंचार क्षेत्रको सहयोगका लागि आह्वान समेत गरेका छन् । नेताहरुले प्रधानमन्त्री केपी शर्मा ओलीको कारण संविधान संकटमा रहेको बताएका थिए । सर्वोच्च अदालतले संविधान र लोकतन्त्रको पक्षमा फैसला गर्नेमा समेत नेताहरुले विश्वास ब्यक्त गरेका छन् ।
नेपाली काँग्रेस सभापति शेरबहादुर देउवाले प्रधानमन्त्री केपी शर्मा ओलीको कारण संविधान संकटमा रहेको बताउनु भएको छ । आज विपक्षी गठबन्धनले गरेको पत्रकार सम्मेलनमा उहाँले दुई पटक संसद विघटन, अध्यादेशबाट मुलुक सञ्चालन गर्ने खोज्ने काम भएकोले यसले मुलुकलाई संकटमा धकेल्ने उहाँको भनाई थियो । राष्ट्रपति र प्रधानमन्त्रीबाट भएको प्रतिनिधिसभा विघटनले लोकतन्त्र नै संकटमा परेको उनले बताउनुभयो । १४९ जना सांसद हस्ताक्षर गरि सरकार गठनको गरिएको दाबी खारेजीले लोकतन्त्र संकटमा परेको उहाँको भनाइ छ । उहाँले संविधान, लोकतन्त्रको रक्षाका लागि नागरिक समाज, बुद्धिजीवि वर्गको सहकार्य आजको आवश्यकता रहेको बताउनुभयो ।
यस्तै, नेकपा माओवादी केन्द्रका अध्यक्ष पुष्पकमल दाहालले देशभित्र विदेशी शक्तिको चलखेल हुन नपाओस् भनेर पाँच पूर्वप्रधानमन्त्रीले सामूहिक अपिल गरेको प्रष्टीकरण दिनु भएको छ । पूर्वप्रधानमन्त्रीहरु दाहाल सहित शेरबहादुर देउवा, माधवकुमार नेपाल, झलनाथ खनाल र बाबुराम भट्टराईले सामूहिक वक्तव्य निकालेर नेपालका बारेमा नेपालीले नै निर्णय गर्नुपर्ने बताउनु भएको थियो । मुलुकको पछिल्लो अवस्थाबारे नागरिकलाई जानकारी गराउनै पर्ने भएको भन्दै अध्यक्ष दाहालले पाँच पूर्वप्रधानमन्त्रीले त्यसलाई आफ्नो जिम्मेवारी ठानेको बताउनुभयो । लोकतन्त्र, संविधान र राष्ट्रको चुनौतीका विरुद्धमा जस्तोसुकै अप्ठेरो परिस्थिति पनि सामना गर्ने उहाँको भनाई छ । उहाँले वर्तमान प्रधानमन्त्री केपी शर्मा ओली कुर्चीका लागि विदेशी शक्तिसामु जस्तोसुकै सम्झौता गर्न तयार रहेको भन्दै ओली र आफूहरुलाई एउटै नबुझिदिन आग्रह समेत गर्नूभयो ।
नेकपा एमालेका वरिष्ठ नेता माधवकुमार नेपालले प्रधानमन्त्री ओलीले गल्ती सुधार गरेमा ठाउँ दिन सकिने बताउनु भएको छ । आज विपक्षी गठबन्धनले आयोजना गरेको सम्पादकहरुसँगको अन्तक्रियामा नेता नेपालले ओलीको अहंकारलेनै देशमा अहिलेको परिस्थिति सिर्जना भएको जिकिर गर्नुभयो । उहाँले आफूहरु देश र जनताको हितको निम्ति दृढताका साथ अगाडि बढ्ने भन्दै आन्दोलनबाट विचलित नहुने समेत बताउनुभयो । देश र जनताको हितका लागिनै आफुहरु आन्दोलनमा जुटिएको नेता नेपालको भनाई थियो ।
यस्तै, जनता समाजवादी पार्टीका अध्यक्ष उपेन्द्र यादवले प्रधानमन्त्रीले लोकतन्त्र, गणतन्त्र र संविधानमाथि प्रहार गर्दै जाने र राष्ट्रपतिले सदर गर्दै गएमा लोकतन्त्र नरहने बताउनुभयो । यादवले राष्ट्रपतिले शेरबहादुर देउवालाई प्रधानमन्त्री नियुक्ति नगरेका कारण उहाँको भूमिका शंकास्पद र प्रश्नवाचक रहेको बताउनुभयो । सर्वोच्च अदालतले संविधान र लोकतन्त्रको पक्षमा, न्यायको पक्षमा फैसला गर्ने विश्वास रहेको भन्दै उहाँले लोकतन्त्र नरहे शान्ति, समृद्धि र स्थिरता अगाडि बढ्न नसक्ने बताउनुभयो ।
