समाज लघुवित्तको आइपिओ भोलि बाँडफाँड गरिने

१४ भाद्र २०७७ , समाज लघुवित्त वित्तीय संस्थाको प्राथमिक शेयर (आइपिओ) सोमबार बाँडफाँट हुने भएको छ। बिक्री प्रबन्धक सिद्धार्थ क्यापिटलले सोमबार बाँडफाँट गर्ने जनाएको हाे।
“समाज लघुवित्त वित्तीय संस्थाको आइपिओ भोली दिउसो बाँडफाँट गरिनेछ,” सिद्धार्थ क्यापिटलका प्रमुख कार्यकारी अधिकृत ध्रुव तिम्सिनाले भनेका छन् । प्राथमिक शेयर बाँडफाँट गर्नु तीन दिन अघि प्रि एलटमेन्ट गर्दै नियामक निकाय नेपाल धितोपित्र बोर्डलाई जानकारी दिनुपर्ने प्रावधान छ। सोही प्रावधान बमोजिम उसले सोमबार बाँडफाँट गर्ने भएको हो। क्यापिटलले शुक्रवार प्री एलटमेन्टको जानकारी दिएको नेपाल धितोपत्र बोर्डले जनाएको छ। यस अघि क्यापिटलले शनिबार नै बाँडफाँट गर्ने तयारी गरेको थियो। तर, अघिल्लाे दिन रिलायन्सको शेयर बाँडफाँट भएको कारण बाँडफाँट सार्नु परेको थियो।

किनकि पछिल्लो सामय एकै पटक शेयर निष्काशन र बाँडफाँट नगराउन बाेर्डले निर्देशन दिएकाे छ। एकैचोटी शेयर निष्काशन र बाँडफाँट गर्दा मेरो शेयरमा बढी चाप पर्न गई वेबसाइट नै सुस्त हुने भएपछि निष्कासन र बाँडफाँटको रुटिङ अनुसार गर्न थालिएको ससडिएसीको भनाइ छ।

क्यापिटलले गरेको प्री एलटमेन्टमा आठ हजार ७० जनाले १० कित्ताको दरले शेयर पाएका छन्। मागभन्दा बढी आवेदन परेपछि उनीहरूलाई गोलाप्रथाद्वारा शेयर बाँडफाँट गरिएको हो। निष्काशनमा योग्य आवेदक पाँच लाख ४७ हजार तीन सय ७० थिए।

लघुवित्तले भदौ ४ गतेदेखि प्रतिकित्ता १०० अङ्कित मूल्यका ८६ हजार कित्ता साधारण शेयर निष्काशन गरेको थियो। यसमध्ये लघुवित्तले १ हजार कित्ता अर्थात् जारी पूँजीको ५ प्रतिशत शेयर कर्मचारीहरूका लागि र कुल निष्काशनको ५ प्रतिशत अर्थात् ४ हजार ३०० कित्ता शेयर सामूहिक लगानी कोषका लागि छुट्टाएको थियो। बाँकी ८० हजार ७०० कित्ताका लागि सर्वसाधारणबाट आवेदन मागिएकाे थियाे।
साभार : मेरोलगानी