८ मंसिर,हेटौंडा- मकवानपुर जिल्ला प्रतिनिधि सभा क्षेत्र नम्बर–२ मा पुर्व स्वास्थ्य मन्त्री समेत रहेका गठबन्धनका उमेदवार नेकपा (एकीकृत समाजवादी) का विरोध खतिवडालाई पराजित गर्दै एमालेका युवा नेता महेशकुमार बर्तौला विजयी भएका छन् ।
नेकपा एमालेका बागमती प्रदेशका उपसचिव समेत रहेका युवा नेता बर्तौलाले ३४ हजार ९१६ मत प्राप्त गरी विजयी भएका हुन् ।
नेकपा एकीकृत समाजवादीका नेता तथा संघीय सरकारका पूर्व स्वास्थ्य मन्त्री खतिवडाले ३० हजार ३९६ मत प्राप्त गरेका छन् । खतिवडाको भन्दा बर्तौलाले ४ हजार २२० मत बढी पाएपछि खतिवडा पराजित हुन पुगेका हुन् ।
त्यस्तै कांग्रेसको राजनीति छाडेर राष्ट्रिय स्वतन्त्र पार्टीमा गएका भरत पराजुलीले १२ हजार ३९ मत पाएका छन् ।
लामो समय देखि नेकपा एमालेबाट पटकपटक विजयी भई बिरासत जमाइरहेका खतिवडा यसपटक एमालेबाट नै पराजित हुन पुगेका छन् । एमाले बिभाजन भइ बनेको नेकपा (एकीकृत समाजवादी) पार्टी रोज्न पुगेका खतिवडालाई यसपटकको चुनावमा ५ दलिय सत्ता गठबन्धन (लोकतान्त्रिक बाम गठबन्धन) ले साझा उमेदवार बनाएको थियो ।
यस क्षेत्रको प्रदेश सभा तर्फ भने गठबन्धन कै उमेदवारहरु विजयी भएका छन् । क बाट माओवादी कि उमेदवार कुमारी मोक्तान र ख बाट कांग्रेसका ईन्द्रबहादुर बानियाँ विजयी भएका छन् ।
