प्रतिनिधिसभाको उपसभामुख पदमा राष्ट्रिय स्वतन्त्र पार्टी (रास्वपा)की सांसद इन्दिरा राना निर्वाचित भएकी छिन् ।सत्ता गठबन्धनको तर्फबाट उम्मेदवारी दिएकी राना १६६ मतसहित उपसभामुख पदमा निर्वाचित भएकी हुन् ।नेपाली कांग्रेसको तर्फबाट उम्मेदवार बनेकी मुक्ताकुमारी यादवको पक्षमा भने ९७ मत खसेको छ ।
२७५ सदस्यीय प्रतिनिधिसभाका २६४ जना मतदानमा सहभागी भएका थिए । मत दिन्न भन्ने पक्षमा एक मत खसेको थियो ।रानाको प्रस्तावकमा रास्वपाकै सोविता गौतम थिइन् भने समर्थकमा नेकपा एमालेका कृष्णगोपाल श्रेष्ठ, नेकपा माओवादी केन्द्रकी नारायणी शर्मा र राप्रपाका राजेन्द्र लिङ्देन थिए।
यादवको प्रस्तावकमा कांग्रेस नेता बद्री पाण्डे थिए भने समर्थकमा एकीकृत समाजवादीका मेटमणि चौधरी र लोसपाका सर्वेन्द्रनाथ शुक्ल थिए ।