हेटौंडा बजारको मुख्य चोकबाट उत्तर -पुर्वको करिब ५ किलोमिटर दुरिमा पिप्ले – मक्रान्चुली खडकखण्डमा अवस्थित रुद्र स्मृति पार्क अहिले आन्तरिक पर्यटनको लागि गन्तव्य स्थलका रुपमा विकास भइरहेको छ ।
मकवानपुरगढी गाउँपालिकाको वडा नम्बर ४ कालिखोला भन्ने ठाउँमा रहेको सो पार्कमा अहिले दिनहुँ सयौंको संख्यामा हेटौंडा बजार लगायत आसपासका क्षेत्रबाट पर्यटकहरु घुम्नैका लागि आउने गरेको स्थानीयबासी विनोद बिडारीले बताए । खासगरी दैनिक बिहानीको मर्निङवाकको समय र साँखपख घुम्न आउनेको संख्या उल्लेख्य हुनेगरेको तथा शनिबारका दिनभने दिउँसोको समयमा पनि घुम्न आउनेको संख्या बढ्दो क्रममा रहेको बिडारी बताउँछन् । दैनिक पर्यटकहरुको आवातजावत बढे सँगै त्यस ठाउँमा होटलहरु पनि खुल्न थालेका छन् ।
पार्कमा माओवादी द्वन्दकालमा २०५९ साल पौष २८ गते हालको बकैया गाउँपालिका अन्तर्गतको छतिवन भन्ने ठाउँमा राज्यपक्षबाट मारिएका स्थानीय रुद्र बहाद्र पाख्रीनको प्रतिमा राखिएको छ भने त्यस ठाउँलाई पर्यटकीय रुपमा विकास गर्न ‘सहिद क. रुद्र पाख्रीन स्मृति पार्क’ का नाममा गुरुयोजना सहित निर्माण कार्यलाई अगाडी बढाईएको छ ।
जस अन्तर्गत कार्यालय भवन , ब्यवसायिक भवन , स्वास्थ्य इकाई भवन , सभाहल , सत्तल सहितको मन्दिर , सार्वजनिक शौचालय , खानेपानी , प्रतीक्षालय लगायत सो क्षेत्रको घेराबाराको निर्माण कार्य समेत सम्पन्न भैसकेको छ ।
सो निर्माणका लागि अहिलेसम्म पौने २ करोड खर्च भएको पार्क ब्यवस्थापन समितिका अध्यक्ष मान कुमारी पाख्रीन (आशा) ले बताउनुभयो । पार्कलाई अझ ब्यवस्थित तरिकाले विकास र विस्तार गर्न तीन वटा ब्लकका रुपमा निर्माण गर्न लागिएको छ । जस अनुसार अहिले भइरहेको स्थानलाई ब्लक एकका रुपमा विकास गरिनेछ । त्यहाँ अब पिकनिक स्पोर्टहरु र गार्डेनको निर्माण कार्य बाँकी रहेकोछ ।
त्यसैगरी त्यसठाउँबाट अलि तल खडकको छेउमा ब्लक दुईको रुपमा विकास गर्न अहिले घेराबारा लगाउने कार्य सम्पन्न गरिएको अध्यक्ष पाख्रीनले बताउनुभएको छ । ब्लक दुईमा तामाङ संग्रहालय , बुद्धको मुर्ति लगायत रमणीय संरचनाहरु निर्माण गरिनेछ ।
मनकामनाचोकमा रहेको खाली जग्गालाई ब्लक तिनका रुपमा निर्माण गरिने र त्यस ठाउँमा बालबालिकालाई केन्द्रित गरेर बालउद्यनका लागि चाहिने आवश्यक संरचनाहरु निर्माण गर्न लागिएको अध्यक्ष पाख्रीनले बताउनुभयो । पार्क निर्माणमा लाग्ने आवश्यक बजेट बाग्मती प्रदेश सरकार र स्थानीय सरकार ( गाउँपालिका ) बाट उपलब्ध हुने जनाइएको छ ।
गाउँपालिकाले वडा नम्बर ४ मा रहेको मनकामना मन्दिर र रुद्रपार्क वडा नम्बर २ मा रहेका विजयपार्क , ऐतिहासिक मकवानपुरगढी दरवार क्षेत्र , ढुङ्गेगढी तथा वडा नम्बर ८ बुढिचौरमा रहेको रिषेश्वर गुफा लगायतका ठाउँलाई पर्यटकीय गन्तब्यका रुपमा विकास गर्न लागिएको गाउँपालिका अध्यक्ष बिदुर हुमागाईले बताउनुभयो ।
