काठमाडौँ- आगामी राष्ट्रिय जनगणनासम्बन्धी काम गर्न सबै जिल्ला तथा प्रदेशमा कार्यालय खोलिएको छ ।
आइतबार ७७ वटै जिल्ला र सातवटै प्रदेशमा जनगणनासम्बन्धी आवश्यक कार्य गर्न कार्यालय खोलिएको हो । काठमाडौँमा पाँचवटा; सुनसरी, मोरङ, ललितपुर, रूपन्देही, कैलालीलगायतका जिल्लामा दुई÷दुईवटा तथा अन्य जिल्लामा एक÷एकवटा कार्यालय स्थापना गरिएको छ । नयाँ खोलिएका कार्यालयमा जिल्ला जनगणना अधिकारी र सहायक जिल्ला जनगणना अधिकारी आइतबार नै कार्यालयमा पुगिसकेका छन् ।
उक्त कार्यालयमा कार्य गर्ने दुई सय अधिकृतस्तरका कर्मचारीलाई विभागले यसअघि नै तामिल प्रदान गरिसकेको जनाइएको छ । तालिम लिएका तिनै कर्मचारी जिल्ला तथा प्रदेश कार्यालयमा गएका हुन् । केन्द्रीय तथ्याङ्क विभागका उपमहानिर्देशक हेमराज रेग्मीले ती कर्मचारीले जनगणनासम्बन्धी जिल्लामा रहेका गणक र सुपरिवेक्षकको व्यवस्थापकीय कार्यमा भूमिका निर्वाह गर्ने जानकारी दिनुभयो । विभागले जिल्ला र प्रदेश कार्यालयमा जनगणनाका लागि आवश्यक सामग्रीसमेत पठाउन थालेको छ ।
यस वर्षको जनगणनाका लागि ‘मेरो गणना मेरो सहभागिता’ भन्ने नारा तय भएको छ । विभागले गत माघ ११ गते गणक र सुपरीवेक्षकका लागि अनलाइन माध्यमबाट करार सेवाका जनशक्ति भर्ना लिन आवदेन खुला गरेको थियो । आगामी २०७८ साल जेठ २५ देखि असार ८ सम्म जनगणना हुँदै छ । गोरखापत्र अनलाइनमा समाचार छ ।
