हेटौंडा / प्रधानमन्त्री तथा नेकपा एमाले अध्यक्ष केपी शर्मा ओलीको हत्या गर्न दुरुत्साहन हुने अभिव्यक्ति दिएको भन्दै राष्ट्रिय युवा संघले काङ्ग्रेस सांसद नरोत्तम वैद्यलाई पक्राउ गरी कारबाही गर्न माग गर्दै जिल्ला प्रहरी कार्यालय मकवानपुरमा जाहेरी दर्ता गरेको छ ।
शुक्रवार बागमती प्रदेशसभाको बैठकमा नेपाली कांग्रेसका सांसद नरुोत्तम बैद्यले प्रधानमन्त्री ओलीलाई रोक्न कोही नाथुराम गोड्से बन्न तयार हुनुपर्छ अन्यथा आफै तयार हुन्छु भन्ने अभिब्यक्ती दिएका थिए ।
सांसद वैद्यको अभिव्यक्तिलाई लिएर चौतर्फी विरोध भएपछि शनिबार वैद्यले प्रदेश सभामा माफी समेत मागिसकेका छन् । युवा संघ मकवानपुरका अध्यक्ष लक्ष्मण उप्रेतीद्वारा हस्ताक्षरित जाहेरी शनिबार मकवानपुरका प्रहरी प्रमुख सोमेन्द्र सिंह राठौरलाई बुझाइएको छ ।
युवा संघ नेपालका केन्द्रीय समिति सदस्य सन्तोष चौलागाई नेतृत्वमा युवा संघको टोलिले प्रहरी उपरीक्षक राठौरलाई जाहेरी निवेदन बुझाएको हो । युवा संघ मकवानपुरले वैद्य विरुद्ध मुलुकी अपराध संहिता २०७४ को दफा ३५ को उपदफा ३ (ख) बमोजिम कारबाहीको माग गर्दै जाहेरी दर्ता गराएको छ ।
