काठमाडौं । नेपालीमा एउटा चर्चित उखान छ,–‘जो चोर उसैको ठूलो स्वर’ । यही उखानको टुक्का हालेर एकजना प्रकाशकमाथि सामाजिक संजाल प्रयोगकर्ताले गाली गर्न थालेका छन् । ती प्रकाशक हुन्, भूपेन्द्र खड्का । कुनै समय रेडियो कार्यक्रम प्रस्तोता समेत रहेका खड्काले चर्चित कवि अर्जुन पराजुलीको कविता चोरेर उल्टो कवि पराजुलीलाई चोरीको आरोप लगाएपछि उनीमाथि गाली बर्सिएको हो ।
बुधबार बेलुका ८ः ५० मा खड्काले सामाजिक संजालमा कवि अर्जुन पराजुलीको कविता राख्दै आफ्नो कविता पराजुलीले चोरी गरेको आरोप लगाएका थिए ।
‘गोरुले गधालाई सोध्यो
भाई ! चुनाव त जितिछस्
तर, मान्छेले
तँलाई मत कसरी दिए नी ? !
गधाले भन्यो–
चुनाव जित्नुअघि त
म पनि मान्छे नै थिएँ नि ।
कवि अर्जुन पराजुलीले सामाजिक संजाल फेसबुकमा राखेको यही कविताको फोटो सामाजिक संजाल फेसबुकमा राख्दै खड्काले लेखेका थिए,–‘लौ हेर्नुस् । मैले ९ वर्षअघि लेखेको स्टाटस त्यतिबेला भाइरल भएको थ्यो । आज तपाईंका प्रिय कवि अर्जुन पराजुलीले चोरेछन् । हैट बुढालाई के भएछ ?’
उनले आफूले ९ वर्ष अघि लेखेको भनेर पुरानो स्टाटस पनि राखेका छन् । तर, खड्काले पराजुलीलाई लगाएको चोरीको आरोप केहीबेरमै झुटो सावित भएको छ । कवि पराजुलीले २५ वर्षअघि लेखेको खुल्यो । सामािजक संजाल मार्फत नै पराजुलीले खड्काको झूटको पर्दा खोलिदिए । ‘आदरणीय मित्रहरु भ्रममा नपर्नुहोला । यो कविता मैले आजभन्दा २५ वर्षअगाडी लेखेको हुँ र लगातार मन्चमा पढ्दै आएको छु । मलाई लाग्छ यो स्टाटस मेरो कविताको कपि हो,’ भूपेन्द्रको स्टाटसको स्क्रिनसर्ट राख्दै पराजुलीले भनेका छन्,‘अझै मलाई चोर बनाउँदै हुनुहुन्छ उहाँ । मलाई चोर बनाउनेको विरुद्धमा अब मैले कानुनी उपचार खोज्नुपर्छ खोज्नेछु ।’
पराजुलीले २०६३ सालमा प्रकाशित जनमत पत्रिकामा छापिएको उनको सोही कविता समेत सामाजिक संजालमा राखेर खड्काको आरोपको खण्डन गरेका छन् ।
‘आदरणीय साथीहरू !
मेरो यो कविता– जनमत साहित्यीक मासिक– मा
२०६३ साल असोज ( पूर्णांक ११५) मा छापिएको छ ।
मेरो नाममा जनमतले निकालेको विशेषांकमा कवि÷ समालोचक रामप्रसाद ज्ञवालीले लेख्नुभएको समीक्षा लेखमा छ यो,’ उनले सामाजिक संजालमै लेखेका छन्,‘आफ्नो सिर्जना अरूले चोरेर चोरले उल्टै किन चोरिस् भनेर दुनियाँका अगाडि धम्क्याउँदा यस्तो पीडा हुँदोरैछ कि उस्तै मान्छे (म) भए आत्महत्या गरिसक्थ्यो ।’
सामाजिक संजालमा खड्काले पराजुलीमाथि चोरीको आरोप लगाउँदै लेखेको स्टाटसमा प्रतिक्रिया जनाउनेहरले खड्कालाई नै चोरीको प्रतिआरोप लगाएका छन् ।
‘चोर त तपाईं हुनुहुँदो रहेछ,’ लालमणी जोसीले खड्कामाथि प्रतिआरोप लगाएका छन् ।
त्यस्तै नितेस रिसालले लेखेका छन्,‘ चोरले कवि ज्युकै रचना चोरेर त्यही कविलाई चोरको आरोप लगाएछ । समाजमा चिनिनै मन लागेको भए नाङ्गै हिँडेपनि हुन्थ्यो होला ।’
पत्रकार धिरज बस्नेतले कवि अर्जुत पराजुलीको जनमत साहित्यीक मासिकमा प्रकाशित अंक राख्दै लखेको छन्,‘आफै चोर्ने अनि अरुलाई चोर दोष लाउने चोरदेखि होसियार !’
माधव छत्कुलीले खड्कामाथि जो चोर उसैको ठूलो स्वर भन्दै खड्कामाथि प्रतिआरोप लगाएका छन् ।
यता सितल सुवेदीले भने भूपेन्द्र खड्का गम्भिर विरामीबाट उठेका कारण स्मरणशक्तिमा ह्रास आएको बताएका छन् । ‘गम्भीर बिरामी भइ उठेका भूपेन्द्रजीको स्मरणशक्तिमा ह्रास आउनु स्वभाविकै हो,’ उनले भनेका छन्,‘लामो समय बिरामी हुनेहरूमा यस्तो विश्मृति हुनु प्रायशः आम कुरा हो । कवि अर्जुन पराजुलीसँग माफी माग्दा उचित हुन्छ ।’