Shubhasamya.com

कतारमा यस वर्षको नोबेम्बरदेखि आयोजना हुने विश्वकपमा फिफाको अनुमतिबिना टिकट बेच्ने वा साट्नेलाई कतारी रियाल २ लाख ५० हजार जरिवाना हुने भएको छ ।

विश्वकप आयोजना गर्ने उपायसम्बन्धी २०२१ को कानुन नम्बर ९१०० अनुसार फिफा र कानुन मन्त्रालयको अनुमति बिना टिकट जारी गर्ने, बेच्ने, पुनः बिक्री गर्ने वा साटासाट गर्ने जो कोहीलाई २ लाख ५० हजार रियालसम्म जरिवाना हुने प्रावधान रहेको मन्त्रालयले जनाएको छ ।

फिफाको वेबसाइटका अनुसार, ‘तपाईँले भौतिक रूपमा वा अनलाइन, बिक्रीको लागि प्रस्ताव गर्न, बेच्न, लिलामीमा प्रस्ताव गर्न, दिन वा अन्यथा स्थानान्तरण गर्न वा स्थानान्तरण गर्ने प्रयास गर्न वा स्थानान्तरणको लागि प्रस्तावहरू सहज बनाउन वा तेस्रो पक्षलाई संलग्न गराउन सक्नुहुन्न।’

कुनै पनि पुरस्कार, चिट्ठा, होटेल तथा उडान प्याकेज वा अन्य कुनै व्यवसायीक प्रयोजनमा फिफाको अनुमति बिना विश्वकपको टिकट प्रयोग गर्न पाइने छैन । त्यस्ता अवैध रूपमा स्थानान्तरण गरिएका टिकटहरू मान्य नहुने र बिना सूचना कुनै पनि समयमा टिकट रद्द गर्न सकिने जनाएको छ ।

टिकटको प्रयोगका सर्तहरूको उल्लङ्घनमा कुनै पनि टिकटको वास्तविक वा प्रयास गरिएको स्थानान्तरणले नागरिक, आपराधिक जरिवाना र दण्डको परिणाम हुन सक्नेछ । टिकटको प्रयोगका सर्तहरू अनुसार, अतिथिहरूलाई कुनै पनि परिस्थितिमा टिकटहरू स्थानान्तरण गर्न अनुमति छैन।

यदि कुनै अतिथिले टिकट प्रयोग गर्न सक्दैन भने, ‘त्यो टिकट आवेदकलाई फिर्ता गरिनुपर्छ। मुख्य टिकट आवेदकलाई मात्र अर्को अतिथिलाई टिकट पुनः असाइन गर्न अनुमति छ,’ फिफाले भनेको छ ।

नोभेम्बर २१ देखि डिसेम्बर १८ सम्म हुने प्रतियोगिताका लागि विश्वभरबाट २० लाख बढी दर्शक आउने अनुमान गरिएको छ ।