Shubhasamya.com

बागमती प्रदेशको कृषि तथा पशुपंक्षी विकास मन्त्रालयले गाई तथा भैंसीमा देखिएको लम्पीस्किन रोगको महामारीलाई नियन्त्रण गर्न आज बिहीबारबाट सप्ताहाव्यापी खोप अभियान सञ्चालन गर्ने भएको छ ।
प्रदेशभर आज विहीबारदेखि ३१ गते बुधबारसम्म पछिल्लो समय गाई तथा भैंसीमा देखिएको विषाणुजन्य संक्रमणलाई नियन्त्रण गर्न प्रदेशभर खोप अभियान सञ्चालन गर्न लागेको पत्रकार सम्मेलन गरी मन्त्रालयले जानकारी दिएको हो ।
एकहप्तामा प्रदेशका १३ जिल्लाको विभिन्न स्थानीय तहसँगको समन्वयमा विज्ञ केन्द्रमार्फत् खोप लगाइने मन्त्रालयका सचिव डा.शरणकुमार पाण्डेले जानकारी दिए । उनका अनुसार यस अभियानअन्तर्गत् ५० हजार खोप लगाइनेछ ।
यस अभियान प्रदेशको ११९ वटा स्थानीय तहमध्ये ९१ वटामा सञ्चालन गरिनेछ । वाग्मती प्रदेशभर करिब २ लाख ५ हजार पशु यस रोगबाट प्रभावित भएका छन् । हालसम्म करिब ६२ सय पशुको यस रोगबाट मृत्यु भएको मन्त्रालयको तथ्यांकले देखाएको छ ।
कृषि तथा पशुपंक्षी विकास मन्त्री डा. राजेन्द्रमान श्रेष्ठले लम्पीस्किनले महामारीको रुप लिइरहेको अवस्थामा अझै धेरै पशुमा संक्रमण हुने सम्भावना बढेको कारण सप्ताहव्यापी खोप अभियान सञ्चालन गर्न लागिएको बताए ।
उनले यस क्रममा रोगबाट प्रभावित गाई तथा भैंसीलाई खोप नदिइने बताए । ‘यस रोगको संक्रमण फैलिएको स्थानमा खोप अभियान सञ्चालन गर्दा धेरै पशुको मृत्यु हुनसक्छ । त्यसकारण नफैलिएको स्थानमा अभियान गर्न लागिएको हो ।’, उनले भने ।