Shubhasamya.com

मक्रान्चुली । उत्तरी पाकिस्तानमा पाँच दिनदेखिको मुसलधारे वर्षाका कारण मृत्यु हुनेको सङ्ख्या करिब ४०० नाघेको र अधिकारीहरूले मनसुनी वर्षा सप्ताहन्तसम्म जारी रहने चेतावनी दिएपछि उद्धारकर्ता र स्थानीयबासिन्दाले मङ्गलवारदेखि जीवित व्यक्तिहरूको खोजी कार्य पुनः सुरु गरेका छन्।

पाकिस्तानको उत्तरी क्षेत्रमा मुसलधारे वर्षाका कारण आएको बाढी र पहिरोका कारण एउटा पूरै गाउँ नै बगाएको छ, धेरै बासिन्दा भग्नावशेषमा फसेका छन् भने कैयौँ बेपत्ता भएका छन्।

राष्ट्रिय विपद् व्यवस्थापन प्राधिकरण ९एनडीएमए०का अनुसार अफगानिस्तानसँग सीमा जोडिएको पाकिस्तानको उत्तरपश्चिमी क्षेत्रमा पर्ने खैबर पख्तुनख्वा प्रान्तमा बिहीवार साँझदेखि अहिलेसम्म ३५६ जनाको मृत्यु भएको छ।

आसपासका क्षेत्रमा दर्जनौँ मानिसको मृत्यु भएपछि पछिल्लो पाँच दिनमा मृत्यु हुनेको सङ्ख्या करिब ४०० पुगेको छ।

खैबर पख्तुनख्वाको अति प्रभावित दलोरी गाउँमा उद्धारकर्ताहरूले हराइरहेका मानिसहरूको शव फेला पार्ने आशामा माटो र ढुङ्गाको थुप्राहरू खनेर उद्धारप्रयासलाई निरन्तरता दिएका छन्।

भीषण वर्षाका कारण खोजी कार्य रोकिएको एक दिनपछि उद्धारकर्मीहरूले काम गरिरहेको बेला गाउँलेहरू हेरिरहेका र प्रार्थना गरिरहेका थिए।

प्रत्यक्षदर्शीहरूले भनेका छन्, “२० मिनेटभन्दा कम समयमा हाम्रो गाउँ भग्नावशेषमा परिणत भयो।”